Stefan Zweig

Stefan Zweig

1881-1942

Germanavaf osteraf suterotik

Osteraf suterotik, Stefan Zweig ba 28/11/1881 koe Wien koblir.

Tis nazbeik ke yudaf kulaf rabik, va vayarugal nuyackon rostar, anton terektason va intafa griva mu suteroteem is trakopa is izvopa. Jonvedeyaf alpoz ke gindaf Wien va inafa rilituca mu datafa tamava tukuvar. Merotulegan koyasik, in va patecteem ke Europa konakviele exuler, va Lentefa Amerika az Mexika az Kuba az Barata az Sri Lanka az Afrika worar. Koe Brasila di awalker.

Mali jotugal, va jontika patecta ke tamava vox dere aryona suterotafa ava kosmar. Stefan Zweig tir kalgermanavasik abdida tir suterotik : va nyubuca ke Émile Verhaeren nik kal germanava cuison remzilir, aze va Charles Baudelaire is Paul Verlaine is Arthur Rimbaud ikz- stekeon malfrancavar. Kan ezla lize turestara ke Hugo von Hoffmannstal is Rainer Maria Rilke tozur : Silberne Saiten ( 1900 ) az Die frühen Kränze ( 1907 ).

Skeus va wenya, dum kot wienikack, ba zirses taneasiel ko wenyaxe mafelatason va sposaf wenyasutesik ke sare dum Hauptman ok Sudermann lanir, aze va pizafa drunta fure toz suter : Tersites ( 1907 ) az Das Haus am Meer ( 1911 ), voxen inaf wenyaf grot wan tir Ben Johnson’s Volpone ( 1927 ).

Viele geja ke 1914 roidar, Stefan Zweig, dum Romain Rolland koe Franca, me trobindar da va vamoefa geltruca ke swavafa tinefkara ke ontinukikeem reme joweem pu basrodayana coseva co wetar. Taneafa tamavafa zivotcara tir ana joara ke inafa blira. Osk ina va tizafa kevsayakevafa kevotcera kan pizafa drunta dum Jeremias ( 1916 ) az Das Lamm des Armen ( 1930 ) di koswar, voxosk dere to dume dun dwir da gan roletaf lidaf vodeem ke titoles selt me zo ortar. Bata gwiduca koe inyon berpotam turestapayan gan Freud zo katrasir. Tulon ozwat : Amok bakestik ( 1922 ) is Verwirrung der Gefühle ( 1926 ) is Sternstunden der Menschheit ( 1927 ) is Vierundzwanzig Stunden aus dem Leben einer Frau ( 1934 ) is Ungeduld des Herzens ( 1938 ) ikz-.

Solve koe gestaraf grabom Stefan Zweig va ageltaf kireem ke lidafa linulara lasubasxatcaxar, drigdason va zolonuca ke bliroti is ikraroti, pune koe grabom wetce malyopasik va wakara do konak logijaf is logedraf gruadik ke darekeugal miledje dun aneyar. Va Stendhal az Balzac is Dickens is Dostoyevski ( Drei Meister : Balzac, Dickens, Dostojewski, 1921 ) az Kleist is Hölderlin is Nietzsche ( Der Kampf mit dem Dämon : Hölderlin, Heinrich von Kleist, Friedrich Nietzsche, 1925 ) siluksilukon koerur. Jontika berpotkorafa blirizva va Fouché azu Marie-Antoinette azu Mary Stuart azu Magalhães akz- tid ke milaf soist.

In to rotir nope bata wayedafa rilituca mu kota adalafa ok irpafa vola ke ayikeem, va zoera ke blifimuca divvawar, i ke blifimuca soe dratcepesa inde grabom dum Die Augen des ewigen Bruders. Eine Legende ( 1922 ) razdar.

Sokes koe Salzburg mali 1919 kali 1934, Stefan Zweig ba bana evla va Ostera bulur aze va London koirubar. Inafa mallapira tir a kona gaderopafa danda kire va abduaneyara dinena gan sutelara va blirizva ke Marie Stuart opelon djumektudar. Voxen guyaf gu stekeugal ke Ostera, koe Engla di zavzagir ise dace va britanaf vedeyot malseotar. Azon ko New York koe Tanarasokeem lapir aze bak anyusteaksat ke 1941 va Petrópolis koe Brasila kiblar. Bana jonvielera nutir plinafa voxen Zweig wison va flaydura ke Europa pikser. Va mivizva ( Die Welt von Gestern - Erinnerungen eines Europäers, Darekeugalafa tamava, setikeks ke lan europik ) tenuker aze ba 23/02/1942 kser, kan jivara do Elisabeth jotafa toleafa yerumanikya.